Dymbëdhjetë pjesëmarrës të programit të trajnimit nga të cilët nëntë nga komuniteti shqiptar, dy nga komuniteti kroat dhe një nga komuniteti turk tanimë kanë përfunduar me sukses trajnimin intensiv tetë-ditor për Zhvillimin e Aftësive për Udhërrëfyesit Turistik në Janjevë, duke përfunduar gjithsej 58 orë ligjerata të cilat kanë mbuluar aspekte teorike dhe praktike të këtij profesioni dhe u janë dhënë certifikatat e tyre të merituara.

Gjatë programit të trajnimit, ata kanë përmirësuar njohuritë dhe aftësitë e tyre në udhëzimin e vizitorëve nëpër mrekullitë kulturore dhe natyrore të Janjevës. Nga ekspozimi i monumenteve historike deri te ndarja e historive magjepsëse, këta udhërrëfyes turistik janë të pajisur tanimë me njohuritë bazë për t'u ofruar një eksperiencë të paharrueshme turistëve.

Urime të gjithë pjesëmarrësve për përkushtimin dhe punën e tyre të palodhur! Pasioni i tyre për të promovuar thesaret e Janjevës me siguri do të lërë një përshtypje të qëndrueshme tek çdo vizitor.

Trajnimi ishte pjesë e projektit tonë “Hartëzimi i turizmit rural në Janjevë” mbështetur nga projekti “Trashëgimia kulturore si nxitës për ringjalljen ekonomike të Janjevës” financuar nga Bashkimi Evropian në Kosovë dhe Ministria e Kulturës, Rinisë dhe Sportit të Kosovës, dhe zbatuar nga Programi i Kombeve të Bashkuara për Zhvillim (UNDP) në Kosovë.