Në kuadër të projektit “Ruajtja e Biodiversitetit dhe Adaptimi ndaj Ndryshimeve Klimatike”, EC Ma Ndryshe ka mbajtur takimin e radhës me profesorët dhe studentët e Fakultetit të Shkencave të Jetës dhe Mjedisit në Universitetin “Ukshin Hoti” në Prizren.

Takimi kishte për qëllim prezantimin e aktiviteteve të projektit dhe nxitjen e bashkëpunimit për të forcuar përpjekjet drejt ruajtjes së mjedisit dhe përshtatjes ndaj ndryshimeve klimatike.

Në këtë kuadër, janë diskutuar edhe mundësitë e bashkëpunimit të mëtutjeshëm, përmes përfshirjes së studentëve në hulumtime dhe aktivitete të tjera praktike, të cilat kontribuojnë në ruajtjen e biodiversitetit.

EC Ma Ndryshe u shpreh e gatshme të mbështesë studentët në realizimin e projekteve që nxisin ndërgjegjësimin e komunitetit për rëndësinë e ruajtjes së mjedisit dhe menaxhimit të qëndrueshëm të burimeve natyrore. Ky bashkëpunim synon t’i pajisë të rinjtë me përvoja praktike që forcojnë kapacitetet e tyre dhe kontribuojnë në qëllime afatgjata për mbrojtjen e mjedisit.