Sot në Prizren EC Ma Ndryshe organizoi konferencën vjetore të projektit “Qyteti Gjithëpërfshirës – planifikim me pjesëmarrje për zhvillim të qëndrueshëm urban në Prizren”. Gjatë konferencës, u prezantuan raportet e veçanta për shtatë grupe të komunitetit, me të cilët është punuar gjatë gjithë vitit 2013, si dhe dy analizat e dytë që kanë dal nga hulumtimet (anketimet) me qytetarët e Prizrenit mbi planifikimin urban. Raportet janë prezantuar si drafte, ndërsa gjatë sesionit të diskutimit janë validuar të gjeturat dhe është kërkuar mendimi i pjesëmarrësve, para se ato të publikohen përfundimisht dhe dërgohen në Drejtorinë e Urbanizmit. Raportet u prezantuan nga ekspertët (autorët) e angazhuar: Dukagjin Bakija, Rozafa Basha, Fisnik Minci, Eli Gashi, Kreshnik Basha dhe Nol Binakaj.

Panelistë të konferencës ishin Z. Sadik Paçarizi, drejtor i Urbanizmit dhe Planifikimit Hapësinor në komunën e Prizrenit, Znj. Rozafa Basha, autore e analizave të hulumtimit dhe mësimdhënëse e Fakultetit të Arkitekturës në Universitetin e Prishtinës dhe Z. Levend Biçaku, udhëheqës i Olof Palme International Center në Kosovë. Pjesëmarrës në këtë konferencë ishin përfaqësuesit e shtatë grupeve të komunitetit, OJQ-të që punojnë me këto grupe të komunitetit, zyrtarët e qeverisë lokale dhe qendrore, ekspertët e planifikimit urban, autorët e raporteve, organizatat partnere të EC Ma Ndryshe, organizatat ndërkombëtare në Kosovë, përfaqësues të institucioneve të zbatimit të ligjit dhe përfaqësues të medias lokale dhe qendrore.

Konferenca vjetore ishte aktivitet përmbyllës i të gjitha veprimeve të realizuara gjatë vitit 2013 në kuadër të këtij projekti dhe moment reflektimi për hapat e ardhshëm gjatë viteve 2014 dhe 2015. Gjatë vitit 2013, projekti ka realizuar 28 fokus grupe dhe shtatë debate me shtatë grupe të komunitetit (të moshuarit, gratë, të rinjtë, personat me nevojat të veçanta, lagjia Arbana, kultura dhe mjedisi), pesë iniciativa avokimi (performansa publike), dy hulumtime me nga 500 respondentë dhe analizat përkatëse dhe shtatë raporte të veçanta që identifikojnë nevojat e grupeve të komunitetit dhe rekomandojnë veprime konkrete për procesin e hartimit të planeve urbane nga komuna e Prizrenit.