Ekspozita “Artefaktet e Kosovës të marra nga Serbia” pas Prizrenit e Gjakovës është hapur edhe në Ferizaj duke shpalosur për publikun fotografitë e dhjetëra artefakteve që vazhdojnë të mbahen në Serbi. Bashkë me ekspozitën për qytetarët dhe vizitorët e Ferizajt janë shpërndarë edhe kartolina me imazhe të artefakteve dhe me mesazhe për nevojën e kthimit të tyre në vendin e origjinës.

Për më shumë se dy dekada, Serbia ka marrë dhe kontrollon një gamë të gjerë të artefakteve të Kosovës. Në këtë periudhë, është dokumentuar se më shumë se 1,247 artefakte janë transportuar në Beograd për një ekspozitë dhe nuk janë kthyer më në vendin prej nga janë marrë.

Përmes këtij aktiviteti EC-i po tenton t’ia prezantojë publikut nga afër një pjesë të kësaj pasurie të çmuar kulturore të Kosovës, që vazhdon të mbahet peng në Serbi. Gjithashtu aktiviteti shërben si thirrje e radhës për të shprehur rëndësinë e kthimit të këtyre artefakteve në Kosovë.

Ekspozita në javët në vijim do të qëndroj e hapur edhe në qytetet tjera të Kosovës.