EC Ma Ndryshe ka përuruar projektin mjedisor të radhës në gjimnazin "Gjon Buzuku" në Prizren. Me anë të këtij projekti të iniciuar nga Eko Klubi është rritur efiçienca e energjisë së shkollës me vendosjen e gjashtë paneleve solare me kapacitet 3.3 kWp.

Në kuadër të këtij projekti në oborrin e kësaj shkolle të mesme të lartë janë mbjellë edhe pisha dhe bimë shumëvjeçare, pastaj është vendosur një parking për biçikleta si dhe shporta për ndarjen e mbeturinave, të gjitha këto me qëllimin për të përmirësuar mjedisin dhe kushtet për komunitetin shkollor.

Projekti mjedisor i Eko Klubit është realizuar në kuadër të projektit "Ndikimi i Rinisë në Mjedis" - YENI të Caritas-it Zviceran dhe implementohet me mbështetje të OJQ “EC Ma Ndryshe”. Projekti përkrahet financiarisht nga Caritas-i Zviceran, Ministria e Zhvillimit Rajonal, Agjencia Zvicerane për Zhvillim dhe Bashkëpunim, si dhe Komuna e Prizrenit.