Duke marrë parasysh rëndësinë e periudhës moderniste dhe faktin që objektet kryesore publike të kësaj periudhe janë të shoqëruara me hapësira publike, të cilat kërkojnë trajtim dhe vëmendje më të shtuar, si rezultat i mos përkujdesjes institucionale dhe ndikimit të faktorit kohë, punëtoria ka synuar identifikimin e hapësirave publike moderne me potencial për tu vizionuar dhe intervenuar në të ardhmen.

Punëtoria është realizuar me pjesëmarrje të përzgjedhur të studentëve të arkitekturës, historisë dhe sociologjisë, duke synuar përfshirjen e disiplinave dhe perspektivave të ndryshme në trajtimin e këtyre hapësirave.
Rezultatet e punëtorisë do të publikohen në një raport përmbledhës që do të ketë si produkte finale vizionimin e 4 hapësirave publike moderne përfshirë këtu: (1) pllatonë e Hotelit “Grand” në Prishtinë, (2) hapësirën në afërsi të “Radio Prishtinës” në Prishtinë, (3) nënkalimin e ndërtesës së Postës në Ferizaj dhe (4) hapësirën publike në afërsi të Teatrit “Istref Begolli” në Pejë.